Cantas de Xavier Navarrot
|
|
D'on sòrti aquestas cantas
ditas ineditas de Xavier Navarrot ?
Tot simplament, tots los tèxtes qui son estat editats deu cantador auloronés que son shens musica... mes, sovent dab indicacion de l'aire sus loquau e's canta. Qu'èi avut l'escadença de crompar lo libe « La Clé du Caveau » (tà'n saber mei sus aquera Clau que sufeish de consultar la mea antologia) e que i èi trobat quauques aires mentavuts per Navarrot. Ne'us hiqui pas tots ací per'mor mantuns qu'an vielhit hèra e que's rapòrtan a hèitas politicas passadas que sols los istorians e comprenerén.
Tà presentar hèra rapidament Navarròt que prefereishi leishar la paraula a Robert Darrigrand qui a escrivut un libe sus lo cantador :
« Navarròt qu'a ua plaça d'elei hens las letras gasconas... Que marca, de cap a 1830, ua reaccion contra los pastors qui sovent n'èran pas sonque nòbles vestits en aulhèrs. Lo gran meriti de Navarrot qu'ei d'aver escobat totas las bergeradas a la francesa, las cançons idillicas qui florivan despuish mei d'un sègle hens la literatura gascona. Dab eth que s'òrb ua via navèra. L'artista qu'espia aus entorns e que pintra çò qui ved dab pro de fidelitat. E quina aisida tà trobar l'imatge qui parla, tà escàder lo coplet que cantaràn los pintonèrs per las aubèrjas ; tà dar vita a ua descripcion ; qu'èm obligats de'u seguir hens la vita vitanta... » |
