- Que balhi ací cantas bearnesas entaus mainats. Aquestas cantas que's tròban un drin pertot mes que son esbarriscladas (que n'i a dejà un bèth sarròt dens la mea antologia de la canta bearnesa) ; que las èi amassadas ací.
- Quan èi començat aqueste tribalh que l'èi tot escrivut en bearnés shens balhar nada virada en francés mes quan l'èi amuishat a quauquas mairs qui volerén apréner quauquas cantas aus lors mainats, com ne mestrejan pas tròp eras medishas la nosta lenga, qu'èi comprés de que seré mei productiu e interessant tà d'eras de que balhèssi la virada en francés. Que'm soi dongas tornat hicar au tribalh e qu'èi hicat totas las viradas. Que'vs sufeish de passar sus o de clicar lo drapèu francés en baish de paja quan voleratz véder la traduccion francesa.
- Que sèi tanben de que i a plan beròi de monde qui ne saben pas léger la musica... Quin ac saberén puishque ne'us i an jamei aprés ? Entà d'eths ua particion qu'ei com tà jo lo chinés... que balhi, dongas, ua interpretacion de totas las cantas per un grop de cantadors virtuaus (que'us coneishetz dejà si v'ètz passejats suu men site mes que'us ve presenti ací) :
« Virtual Singer » qu'ei un modula qui hè partida d'un logicièl de musica « Harmony Assistant » creat, desvelopat e comercialisat per la societat Myriad de Tolosa. Aqueth modula que permet de recrear la votz umana o, meilèu, de la simular... Que son sons qui tribalhan entà'us har cantar. N'ei pas tostemps aisit de har cantar aqueras « votz » en bearnés. Quauques fonèmas que m'an balhat hèra mei de mau que non pas los autes. Que son d'aulhors los mei mau escaduts. Si aví volut har la medisha causa dab un grope de cantadors amators vertadèrs que m'averé calut annadas e annadas entà aver quauquarren qui's posca presentar e sustot escotar.
L'avantatge deus cantadors virtuaus qu'ei que, de tira, en légent la particion, que cantan juste, estranhament dilhèu, mes juste.
Que sèi plan çò qui diseràn los puristes de tot peu, los especialistes d'açò e d'aquerò, los vertadèrs e los autòproclamats. Qu'ac sèi puishqu'e m'ac an dejà dit... mes n'ei pas tà d'eths qui hèi aquerò (ne soi pas totun pro pèc tà'us dar bròcs tà'm har chacar)... Que pensi que taus ensenhaires o taus parents qui ne saben pas léger ua particion, açò, a maugrat de las soas imperfeccions, que pòt totun estar un bon utís entà apréner cantas.
E puish que pensi tanben que, entà hèras, aqueths cantadors virtuaus que deu estar ua curiositat com e n'ei estada entà jo.
Auta causa : que hiqui dens aquestas rubricas mantuns gifs animats. Qu'èi hèit los uns mes la màger part deus autes que'm vien d'internèt e sustot d'un site espanhòu « Los gifs animados de Palermo viejo »
