Si èri esparnhaire, b'averí jo hèra de paur...
Perqué ?
Qui a dit a Tolon,
« nat esparnhaire ne perderà un sol eurò de çò qui a depausat dens las bancas ? »
E òc, qu'ei lo medish òmi qui s'ei hèit eléger en prometent de que lo poder de crompa qu'anava estar aumentat tà tots.
E qu'avem vist ? lo poder de crompa sustot lo deus qui l'avèn dejà hèra baish, qu'a d'enqüèra baishat en hant un hardèu de mei praubes. [Siam totun justes : qu'a aumentat lo poder de crompa deus amics e de quauques uns qui avèn dejà pro de qué crompar].
Qu'ei tostemps lo medish òmi qui a dit que la creishença que la haré créisher... en l'anant cercar, si ac calè, dab las dents.
E qu'avem vist ? que i a dilhèu deishat lo dentièr mes creishença arren, pas ua sola brigalhèra... au contra que s'ei d'enqüèra escapada mei luenh. [Siam totun justes : ne sèi pas si a reflechit abans de parlar mes ne deu pas estar aisit de gahar la creishença dab las dents... autant vau ensajar de nhacar lo vent.]
Alavetz adara quan ve ditz çò qui davanteja sus los esparnhaires qui ne perderàn pas arren, que i a de qué aver paur... e medish que i a de qué hà'n de la fina.
E que'vs ditz aquerò tostemps dab lo medish aplom trepejant, la medisha assegurança, la medisha arrogància mespresosa qui'u hè préner per cons tots los qui ne son pas eth.
E qu'a tostemps bonas rasons entà's disculpar per'mor l'òmi qu'ei coratjós mes pas temerari [brombatz-ve quin sabè beròi cercar lo pescaire breton... plan protegit per dus o tres rengs de guardacòs] : lo caumatge qu'a aumentat en agost... e òc qu'ei per'mor de la crisa financèra de seteme. Las crisas, que's sap, qu'an un efèit retroactiu.
Òh mes l'òmi aqueth qu'ei tot a fèit capable de v'explicar que la guèrra de quatorze qu'ei devuda a las trenta cinc òras.
E que i a tot un sarròt de cortesans politics e jornalistas entà s'esmiraglar davant lo tot petit reipetit : d'après eths, l'òmi qu'ei mei hòrt que lo hilh deu noste defunt Terrible.
Mes tot aquò « que finirà mau » com escriu l'un deus lors.