Que torni hicar ací aquesta rubrica qui ne vòu pas briga estar un cors de latin mes meilèu un divertiment (qui'ns va totun amuishar quin daubuns mots latins an balhat los nostes mots bearnés).
Dens los mens tres sites qui an davantejat aqueste, qu'i avè tanben aquesta partida. Puish com me demandava pro de tribalh shens me balhar nada reaccion deus visitors (totun numerós d'après las estatisticas deu men aubergador), qu'anoncèi de qu'anavi clavar aquera rubrica. Mes qu'èi recebut e-mails de joens collegians qui'm demandan e de la contunhar e de l'entertiéner regularament. Que son eslhèves qui estudian lo latin (e bahida lo bearnés).
Puishque çò qui hèi e pòt servir, qu'èi decidit de la repréner dab ua fòrma un drin diferenta : en lòc de balhar ua cordèla de règlas de derivacion e de passar après aus exemples, que serà dilhèu mensh aburiu de véder aqueras règlas en tratant dirèctament exemples causits. A vosautes visitors (joens e dilhèu mensh joens) de'm díser si preferitz aquera faiçon de har o si'm cau tornar a çò qui hasí abans (hèra mei escolar).